احلام فتاة فلسطينية ..........؟؟؟؟؟؟؟؟

والله يسلم ايديكي وتمك كمان على هالكلام
ياريت تتحقق احلامك اللي صارت مش بس حلمك
انتي حلم كل صبية وشب كبير وصغير والشيخ
والطفل وبالنهاية ما بنحكي الا الله يجعل كل الاحلام تتحقق
الاحلام اللي مش المفروض تكون احلام لازم تكون
واقع بنعيش فيه.

نا مش فتح و مش حماس و كمان مش جبهة شعبية ,, انا بنت عادية وعندي شوية أحلام وردية ,, اسمعوني و طولو بالكم عليي و نفذولي طلباتي بروية......

بدي بالإجازة أزور الضفة الغربية .. نفسي كتير بالزعتر الأخضر والميرمية الجبلية و نفسي أشوف زهر اللوز بأرضه الأصلية و نفسي أتوشح بالكوفية من غير ما أعمل حساب لأي أذية ... نفسي ابن الضفة كمان يجي على غزة و يسبح في بحرها و نطعمية بقلاوة و كنافية عربية ونابلسية و يحكيلنا لا لا الكنافة أصلها الضفة الغربية


نفسي بمناقيش زعتر بس بزيت زيتون من الضفة الغربية و كمان نفسي بالملبن اللي كان يجيبو سيدي الله يرحمو من القدس و كمان نفسي بكل الحلويات الشعبية

نفسي ما يحكوا على ابن غزة " غزاوي " و على ابن الضفة "ضفاوي" لانه كلنا فلسطينية ... نفسي تعملولنا بغزة شط بحر أو كورنيش مرتب و منظم لأنه بالصيف بكون مفلسة و مام عي مصاري أقعد بمطعم أو كافتيريا

سامحوني بس انا طماعة بدي كمان علم و معرفة و نفسي أتعلم بالجامعة تخصص تاني بس أهلي ما بيقدرو يدفعولي رسوم مرة تانية لهيك نفسي بجامعة حكومية أو جامعة برسوم رمزية بدل الجامعات الاستثمارية اللي عبت البلد



نفسي لما أزور بيت جارتنا الحمساوية ما أخاف على راتب أبوي وأخوي ينقطعو من رام الله ونفسي لما أزور جارتنا الفتحاوية ما يفكروني اللي بغزة متآمرة وبدي أخرب أمن البلد و كمان نفسي لما أزور جارتي الجبهاوية ما يحكوي عني شيوعية

نفسي المريض بالقلب ما يضحكو عليه بمستشفيتنا الحكومية و يحكولو عمليتك متل شكة الدبوس سهلة كتير و بعدين ييقتلوه بخطأ طبي و كل هادا لأنه ما عرف يسافر يتعالج برة عشان ما في معبر أو ما عندو واسطة قوية سواء بغزة أو بالضفة الغربية

نفسي أبطل أحلم بجرة غاز وغالون بنزين و كيس طحين و أصير أحلم بالماجيستير و الدكتوراة و المشاريع اللي كلهم صارو عالفاضي ببلدنا....


نفسي ما أترك اللي بحبه عشان ظروفه المادية و نفسي صاحبتي اللي اتجوزت تبطل تتخانق مع زوجها بسبب المصاري وسوء الحالة النفسية و كمان نفسي صاحبتي اللي اتجوزت بالضفة تحبل وتجيب بيبي و أشوف اولادها بدري لأنهااتفقت مع زوجها و أجلو الموضوع عشان مش ملحئين صرف مصاري ما بين 400$ اجار بيت و مصاريف ضرورية...نفسي صاحبتي اللي بغزة ما تتجوز الختيار اللي متقدملها بس عشان معه شوية مصاري و حالته المادية خيالية

نفسي الشباب يبطلو يحلمو ببطالة ال6شهور اللي بتطلع من الوكالة و كمان نفسي يبطلو يستنو بطالة ال3شهور تبعت ألعاب الصيف بالإجازة الصيفية...

نفسي الشباب اولاد الناس و المرتبين ما يهاجرو عالدول الأوروبية

بشوف بمنامي كتير الأهرامات و حدائق بابل المعلقة ,,, راجعت تفسير الأحلام بس ما لقيت تفسير واضح و بعدين قلت لحالي ليش عملت هيك ما انا نفسي أسافر على مصر و العراق و أتفسح و أشم الهوا و أشوف الأماكن التاريخية ... نفسي تعملولنا مدينة ملاهي حلوة و كبيرة بدل شوية هالألعاب المصدية

نفسي بالبضاعة المستوردة المنيحة بدل الستوكات الصينية ... نفسي نصير نصنع عصير طبيعي بنفس جودة منتجات تيبوزيما الاسرائيلية ... نفسي لما أحط بياناتي عالفيس بوك بخانة الدولة يكون في دولة فلسطينية مش فلسطين تكساس وكمان لما أحط المدينة الأصل يافا ما يكون جمبها كلمة اسرائيل و تصير الناس العربية تبعتلي رسائل شتائم و بهدلة لانهم بفكروني اسرائيلية


نفسي يكون لنا دولة فلسطينية ونعيش بحرية ما في سجون اسرائيلية ولا اعتقالات سياسية

نفسي يكون لنا دولة فلسطينية ونعيش بحرية ما في سجون اسرائيلية ولا اعتقالات سياسية

هذا اكبر حلم لكل فلسطيني
وشكرا جزاك الله خيرا

حلم كل فلسطيني حر وفلسطينية حرة