وين أيامك يا فلسطين/مشاركة امال ابو خديجة

وين أيامك يا فلسطين
أيام البيارة والكرمة وشجر الزيتون

وين أيامك يا فلسطين
أيام الكوفية والدبكه واليرجول

وين أيامك يا ستي بالعشية
تحكلي قصة تاريخ وأرض وثوار

وين أيامك يا ستي بالصبحية
تصحيني على ريحة خبز الطابون

وين أيام شجر التوتة و ساحة الدار
والسهريه تحت العنبة وشجر التينه

وين أيام فرش الحصيرة على سطح الدار
والنومه تحت العريشه في ليل الصيفه

وين أيام صوت الطبلة والزغروده
واللمه الشلبيه بعرس ابن الجيران

وين أيام الجيرة الملتمه بالصبحية
والعشية على شرب القهوة وكاسة الشاي

وين أيام خبز العجينة داخل البيت
وأكل الزيت والزعتر والزيتونه

وين أيام الفجرية نصحى ونقوم
على صوت بابور النار وريحة الشاي

وين أيام الشتوية إمي دفينا
في الصبحية والعشية بكانون النار

وين أيام الياسمينه على باب الدار
تفوح ريحتها بالصيفية عطر وريحان

وين أيام لعب أولاد الحاره
بيت بيوت ونط الحبله وسبع حجار

وين أيام البيارات وسقية الميه
وعطر أشجار الليمونه والبرتقال

وين أيام طلوع الجبل
وقطف الرنجس وقرن الغزال

وين أيام الشهامة والمروءة
لما نسمع بمصيبة عند الجيران

وين أيام الوطنية وضرب لحجار
لما نسمع طفل إستشهد وأمي بتشكي

وين أرضك يا فلسطين عم بتروح
بصادرها صهيوني غاصب محتل

وهيك بتصير القضية عم تصغر
والشعب نايم وبتفرج ومش مهتم

وبتصير حكايتنا حكاية شعب
عاش فيها من زمان بتاريخ وأرض

الله يرحم أيامك يا ستي
ويرحم أيام العيشة الهنية والرضية

والله لو ترجع أيامك يا ستي
لتقولي ليش الأرض ضاعت وماتت القضية