( مسحراتي ) .. نبيل مصيلحي

مسحراتي





م السنه للسنه
فانوس منَّور بالغُنا
عيِّل مصهلل للآدان
تمشي الخطاوي
في ضيا القناديل عيال
ومسحراتي إنما عاشق غناه
نجمه على كف السحور
ينده تقيد الضلمه نور
أملُه المنَّدي بالدموع
عوده على جناح الأمان
تصحا على دق الحروف النور
شبابيك العقول
وتصحِّي في عروق الحياه
موَّال عطوف
في الروح يطوف
في حنايا قلب يزغزغه
ويشوف حلاوته في الهلال
يا " بدر " يا ضي التاريخ
يا ابو الفوارس مؤمنين
وملايكه قايمه بتحرسك
كفَّك عِرق
ندَّى على الرمل ارتوى
ومشاعل الفرحه
بترقص في القلوب
يا " بدر " يا ضي التاريخ
آه لو تعود ....
يا حرفي / يا صبحي الجريء
عدي الطريق
شِد الغريق
م العتمه نورك ينشله
ويبسمله
دا النجمه لمِّت م الشرود
خنازير .. قرود
سته في نجمايه إنما
إيدين الكابوس
فرشت بوعد ما لوش عيون
فوق الجتت
فوق الزمان
فوق الزتون
دنيا الأنا
والوهم لبلاب الجنون
" عواد " على صدر الزمن
ميت على قيد الحياه
واتدهوست تحت الجزم
أصوات قلوب
ونبض طير مكسور جناحه
بينطفي جوه شراين الكلام
والقهر في عيون النخيل فارس
وفي إيديه الزمام
أيام بتتمخض أهات
أحلام بيرويها الموات
ومسحراتي
...